PUONLAISEN LE NGOTEKHER INTAN DAN

HMAR PUONLAISEN LE NGOTEKER HUNG PIENG SUOK DAN LE HUNG INSIENG DAN By L. Tlanthang Infimate, Parbung

PUONLAISEN hi Hmar nunghak ‘Tlingi khawbung’ lo ̕ṭieldawk le a lo khawngsuok nia hriet a nih. Pi Tlingi hi Pu Ahau a nuhmei ani a, Ahau hi Hmar Khawbung ani nghe nghe bawk. Pu Ahau hi Khawbung khuo (Mizoram) sattu a lo nia a nuhmei Pi Tlingi hi Hmar nuhmei laia puon khawng thiem a hril ani bawk.

#PUONLAISEN hi Khawbung khuo Mizorama a um laia a lo tiel dawk le a lo khawng suok ani a. Khanglai huna khan rawng a la suok naw leiin eini tuol rawng hieng Muo-rawng,In̕ṭing-rawng (Meikhu-in a ur a lak dawk ani a rawngdum (Black) an lak dawk hlak), Sunhlu hawng rawng, pat senturuk rawng le rawng thing hai hmang in puon̕ṭiel an lo khawng suok hlak.Thing rawngmu hi chang-altui leh an lo suong chun Sertlum (Orange) rawng mawitak el a hung suok, chang-al a al naw leh Sendang(Pink) rawng mawi tak a suok thei bawk, hieng rawng hai hmang hin Pi Tlingi hin PUONLAISEN mawi em em el hi alo ̕ṭiel dawk le a lo khawng suok a nih. Pi Tlingi tunu Hawikim Khawbung hin Vaipat ahung suok phing leh a pi PUONLAISEN hai chu sie̕ṭha in a lo kawl zinga Vaipat, vairawng a hung suok phing leh Pi Tlingi tusuon pahnina Hawikim hin mawi takin a ̕ṭiel ding ang ang rawng a hung hmang chun mawi an ti em ema a hming dingin PUONLAISEN ni raw seh an hung ti ta a nih.

Khanglai hun a khan Thingrem khawm an la nei naw leiin Pi Tlingi hin ama puonkhawng Tuibopuon hai chu ̕ṭhui pumin thingrem ang a hmangin Sai-ip ruol bit pathum Puon khawngsa a lo sie hlak.

HMAR NGOTEKER: Ngoteker hi Pi Hawinu,Pi Thangi le Pi Lienkim ruolcham 3 hai ̕ṭhangkhawm a an lo khawngdawk le anlo ̕ṭiel dawk ni ngeia hriet a nih. Eini PUONLAISEN le NGOTEKER hi Manipur (abikin Churachandpur Dist.)Tribal hai le Mizoram a nuhmei hai chun ei Hnam puon sengah ei lo ngai ta bawk. Hnam hminga Inkhawmpui le ei Hnam nipui ni a hai seng incheina hai a nuhmei haiin an bil naw chun hnam inchei ah an inngai thei ta naw bawk. Hieng ang ei ni tribal lai a hnam puon, inchei hlawtak le mawi tak el hi a ̕ṭiel dawktu le a neitu ei nih ti hi chieng ei ta ei kut suok lieu lieu a nih ti hriein humhim tum seng ei tiu. Ei hnam rohlu ei pi le pu kutsuok le pi le pu hla le ei hnam lam hai le ei puon zie mawi tak tak hai hi, a bik takin HYA, HWA, HSA le ei politician hai hin a humhim le a enkawl that hi ei mawphurna a nih ti hi chieng zuol nawk ei tiu.

Source: Hmasawnna Thar; October 8, 2013