Ka Lung D-1

Ka Lung D "kum tamtak a liem hnung khawma ka theinghil theilo.Ama ka tawng ni a,a hmel mawi em em le a rawl mawi em em kha ka lungrila hin ala cham zing a.Ka ta ding chun ama anga ka lunglai hluozotu an la um ngai naw a.Kumhai liem-in sakhmel hai ang tar hnung khawma,KA LUNG D,a sakhming ka ko nghawklo chu ala ni rawp hlak". Kum 2003 a hung tlung a,ka pa'n skul kai di'n ami tir a,ka rin ngei el.Kum 9 mi zet ni ta langkhawm,nitinna ka ruolhai le khawhnawm-a inhnel hlak kan leiin skul kai chu ka ngaituo phak ngai nawh.Skula ka fe nuom naw leiin ka pa'n ami hlap zêk a.Kan skul tuol chen ami thak zo chun ami kîrsan nawk a.A kîr ta maw ti a zuk kîr ka tum chu ami lo la hmu phak leiin kan thungna dingah ami thak a.Lungawinaw em em chun skul chu ka kai tan ve ta a.ka ruolhai-khawhnawma kan hnel chanpui hai an um ve naw a.Ruol ding ka nei ve naw leiin kârkhat sûng chu ngai ka aw thei mang naw a.Sienkhawm sawt met hnung chun ruol ka hung nei ve ta a,inhawi ka ti ve ta hle. Kan skul hi Hmar-medium a ni a,A B C khawm inchúk ve lovin A Aw-Puikurung a'nthawkin kan chúk tan na.Ka ruolpa leh kan class-a a lientak kan na.Intipui em em in tlar nuhnungtak-ah kan inthung a,hotuhai thil hril khawm kan úksak ve ngai nawh.Kum chanve July thla chun Buhmasa(zirtirbu) ka zova.Zirtirbu ka zo ni chun anhawi ngei el.Ka ruolha'n an mi'n thlana'n hla ansak,an sakzo chun an mi chibai seng a.Ka ruolhai po po an tin hma'n ka lo tin a.Tukhawm kan hnar bîk dêr nawh.A zîng a chun class thar-Pawltenbawng ka zawm a.Ka class chanpui ding ha'n an milo chibai a,an fel thei ngei el.A thar tak kan leíin kan zak thei hle.Ka tawng fel theinaw leìin homework kan inzawt ding pha khawm,kan zak em a,hotuhai hrietnaw kar an zawt tahai lai ka lo um a,kan zawt ve ngai nawh.Exam kan nei a,answer paper ka va submit zo chun kan hotupa'n ami hung kova.Ka va fe chun English hawrawp 'U' hi a min lamrik tir tum a.Ka ruolhai le exam hall-a um po po chun an mi en tuor a.Ka ti thei ta si nawh.Kan zak luot chun tap pumin ka tlân dawk a.Hieng hin chu lekha inchúk hrepin hlawtlingna chang langkhawm,ka tawng fel theinaw chun iengkhawm ni chuong nawng ka tih.Lekha ka tiem zâtin mi'n mi nuisan an ta ka ti a.Vawikhat khawm skula fe talo ding chun kan sukthlûk ta a.Kârkhat hnung chun kan result a hung suok a,6th.position ka hung tling phâk chu ka lawm ngei el.Ka passéd lawmna'n ÂR kan that a.Chutak a'nthawk chun ka hunp phûr nawk ta em em a.Skul chawl dinga ka lo tum lâwk khawm chu ka thul nawk ta a.Kum tawp exam chun 2nd.position ka tling phâk ve ta a.Pathien zâr chauhvin A Aw-Puikurung,Buhmasa le Pawltenbawng chu kum khatin ka zo vawng a,tukhawmin ka tawng khawm an mi nuisan ngai ta nawh. Class-vi kan ni kum chun skulah kan riek khawm hlak a.Kan hotupa'n kawlphe elvar a nuhmei sexy deuh lim inlang theina a neia.Chawllai a elvar-in tawk kan inchû hlak.A kar lem chu kan class girl-hai a zuk elin inhmaw em em-in nuhmeitehai sai malam-in kan va them tum hlak.Kan class hi kan nghal thei taluo a.Kan hotuhai lem chun zawmaw-rawng in kai an mi ti hiel hlak.Vawikhat lem chu class-vii hai leh pilvut-in kan in dêng a.Class dang kan sukbuoi leiin kan headmaster pa'n ami hlap seng nghe nghe.Kan class hi kan inthuruol bawk a,tukhawmin an mi sukbuoi ngai nawh. Kum tawp a chun fare-well kan nei a.Zâna chun fun-night kan nei a,skula riek venaw hai khawm an hung thang ve a.Kan class girl-hai leh inring deuhva kan khêklai tak chun kan hnungtieng a'nthawk-in mi pakhat hin 'Nghawk in um taluo,dam te'n khêk ro.Nangni chauh in hlim nawh',ami hung ti a.Ka lungsen taluo chun ka nghakîr a,zuk dawnlêt ka tum chu tleirawl hmeltha tak hin ami lo en zing a.A hmel that em lei chun ka lungsenna le dawnlêt ka tumnahai po po chu ka theinghil vawng a.Kan tuiral vawng ni'n ka hriet el a nih.Ama chau chu ka ngaituo ta ngat ngat el a,thil dang reng ka ngaituo thei ta nawh.A bieng inno sentâwt el chu thlier zing ka nuom a,ka en ngam si nawh.Ka fun-night hmang khawm hre chang talo chun 'ka enchimlo' chu a lungril ka nei thei dân ding ngawt ka ngaituo ta a.Fun-night kan hmang zo chun inzaktak le inthin dawr dawr pumin a kuomtieng ka va pan a.Ama chun nakie ta ka hung sawisél che kha i lungsen ngawt a tih ami lo ti a.Ka lungril chauh chun 'Lungsen ngaina um lova,i hmel a tha em leiin ka lungril an tui vawng a.I hmel ka hmu a'nthawk khan nang ngawt kha en che ka nuom a,ka hung en ngam si naw che.Thil dang iengkhawm ka ngaituo thei ta naw a.Inzak khawm dawn lovin hung pan chawt el che zuk ti ka nuom a chuh',ka ti ta em naw a.Kan hming dam kan inhril tawn a.Sawtnawte hnung chun an in kan lo tlung dêr el ta a.Ka ruolhai le chun kan lêng nghal a.A fel ngei el,kan thungna dinghai ami pêk a,tui dam a hung sem a.Ka tui dawn ta po po lai a lan hnik tak ni'n ka hriet.Hril nuom tamtak nei lang khawm ruolhai leh kan ni leiin iengkhawm ka hril ngam nawh.Âr an hung khûnga,Sana ka zuk en chun 12:am alo ni dêr ta a.Kan tin chun an sumphuk chen ami hunga inthla a,kan in mangtha tah a.