Ka Zuom Lul Nawh

_____________

KA ZUOM LUL NAWH

Khawkhat lal nau ka ni a,ruol pâwl ding chu kan vai ngai nawh. Ka fèna tieng tieng bodyguard ka nei zing hlak a. Ka nuom na naah ka fe thei vawng bawk. Lalnau ka ni bawka ni'ng a ta nunghak chu ka hmaah an intlar nghennghuon zing el hlak. Pieng nal taktak,hmelțha le var taktak an ni tawl a. Tha taktak an tam vei leh mi dang an pasie leia mi hrietfûklo khawte nunghak pakhat hin ka lungril a hnè bîk tlat a. Ama hi chu piengnal tak chu an naw a. An harsa leiin lekha khawm an chûk insáng bêk nawh. A mit menghai chun inngaitlawm tak hmel a puta,a hmel ka hmu hin chun ka dam vawng vawng hlak.

Sawtmet hnung chun kan hung inngaizawng a,kan hlimin inhawi kan ti thei ngei el. Ama le kan inkawp chu mi tamtakin an mi thîka,ruol nei tam hle inlang khawm ruol ringum chu kan nei tam naw hle. Mi dang dangin kan kâr thu siet dan ding ngawt an ngaituo ni'n ka hriet hlak. Ka pate nau ni bawk pakhat hi ruolțha ka neia,ama kuomah chu ka hmangai le kan chanchin ka hril vawng hlak. Kei kan hman naw châng khawm ka ai-in ka hmangaitak kan dingin ka tir hlak a,rin lovin a fe nghal hlak.

Kan skula kai ve dingin khawtea um chu kan khuoah ka thuoia,thei ang anga a kai dan ding kan sukfel hnung chun a hung kai ve a. Kan chanchin a hrenaw bêk bêk an um naw leiin kan inthup chuong ngai nawh. Inhnu metin vawikhat skulah a hunga,a hung tlung chu ka lawm luotin ka ruolhai um khawm pawisa lovin ka va kuoa. Chuonga ka va kuo chu ka pate naupa'n alo theida tlat el. A lungsen chun,"khang khan milai um zie naw ro," a mi ti a,inring deu chun a khêk rak a. Chutak a'nthawk chun ama umlai chu kan fimkhur met ta hlak.

Nikhat chu kan ruolhai leh ka tarpu dinga ka huol hai khuoa chun ka hmangaitak leh kan fe a. An ram chu khawte ee..tilo chun an hawi ngei el. Dîl thienghlim tak tak a tam bawk. Kan ruolhai panga vêl le chûn dîlah kan in hlieuva. Kan zuk suok char chun tui vâr em em kha tuihawk angin a hung uma,a zatve zêtin a phai a. Chulai tak chun ka ke-ring a hung chat bawk. Mak ti deuva kan en zing lai chun misuol ruol an hung a,ka hmangai chu an man a an fehmang pui nghâl a. Ami guard-tu chu hnawt zui dingin ka tîr a. Kei khawm chu inhmaw em emin shortcut tieng chun tlânkhal tumin ka tlan vea. Sawtmet hnung chun ka ruolțha..ka pate naupa chun ka hmangai chu alo man zinga,ka va san leh chempuiin ka kut rîng alo sâta,kan buoipui laitak chun nuhmei pakhat hin chemin ka ruolnu chu a dár changtieng a hung sât nawk a. Khawmuol hrelovin a tlu tawp a. Ka kutna khawm hrefu talo chun ka kuo a. Bíek tawng zo an ta naw a. A thisen hlak chu a luong zing bawk. Ka thei tawk tawkin ko langkhawm ami dawn thei tanaw a. Amit an siem ding ka tuorzo naw chun ka theitawp a ka ko chu ka khêk dawk a. Ka zuk meng chu ka zân mang lo ni-in,ka thawveng huoi a.

Mang mei mei nisienkhawm kârhni suong chu ngai ka aw thei thlawt nawh. Manga I mi liemsan ding hman hman hieng lawma ka tuor chun tuhin a takin mi liemsan ta ang la ieng ang lawmin nam tuor ka ta. I hnung zui el naw chun damzo kan ring nawh. Nangma ka hmangaitak ka lungril Lalnu I thangnaw chun hringnun hmang KA ZUOM LUL NAWH..KHUONU'N MI HUOLHIM-IN DÂR ANG EI INTAWNG NAWK NGEI KA BEISEI. ___________